Archivio bozze

SERIE D

Lucarelli perfetto, Guazzo no. Zero all'arbitro

10 novembre 2015, 06:00

Crociato 63

Zommers òt

E cme sémpor in-t-l’ùnnica ocazjón ch’ at’ vén ciamè in cavza at’ rispond con la grand paräda o la grand usìda cme jerdlà: in bòcca al lòv par la Nasjonäla

Adorni séz

Parfét dardè, purtrop a ‘n t’é mìga catè la cadénsa giùssta par fär mäl davanti; di vè, mo al sät ch’ at’ si mägor un bél po’, fòrsi anca un po’ trop? Cuand a té t’ si cavè la maja ala fén ädla partìda, a té s’ pól fär il lastri con ‘na candéla a ti ! magna putén magna

Caciól sètt

L’éra al tò camp e la tò partìda, t’é catè di avarsäri codìggn e pront a véndor la péla cära bombén, ti a t’é fat al tò e a né t’ si mìga andè indrè d’ un centimèttor mo purtrop a n’é mìga bastè par vénsor, a gh’ vräva un colp cme a Barsél, mo purtrop a n’é mìga sémpor domenica

Lucaréli òt

Partìda parféta, äd n’ätra categorja cme l’é cuäzi normäl ch’ la sia, la sfiga la t’ à neghè un gol favolóz, e purtrop a t’é tochè sconsumär pù fjè adrè a n’arbitro veramént ridìccol che a j’avarsäri;

Ägorfój séz

Trop alzarén. jerdlà a gh’ vräva Attila insìmma al fàsi, at’ gh’äv da cavär l’erba, un motór a cìnngoj, invéci a t’é zughè in pónta äd forsén’na, cuand lilór invéci i gh’ ävon tutt la coràsa cme j’antìgh Romàn;

Corapi sètt

Dì Ciccio mo cuant bòti ät ciapè? Di la vritè che sa t’aviss podù a cóll pajas con al fis’cén at’ gh’ ariss dè cuàtor zmaflón a man invèrsa vlontéra? Parchè sóra al cont al paräva pròprja tór anca p’r al***! L’impresjón ch’ l’à dè par novanta minud l’é städa pròprja còlla lì;

Giorgén sètt

Anca ti cuant bòti chi t’ àn dè! Cära al me Gigi, sérca ‘na solusjón anca a sta roba chì, parchè n’ezìsta mìga che par novanta minud as’ n’ in ciàpa ‘na spòrta e ‘na cavàgna e basta, chi a gh’ vól vón anca lì in méza ch’ al zgròssta par trì, parchè i nòstor dù picén lì in méza tecnicamént j’én äd n’ätor pianéta mo i bùsscon tròp;

Sowe séz

Elóra sérca prìmma äd tutt äd mèttor su sètt o ot chilo parchè con cóll fìzich lì at’ pär Kirikù, al cartón animè african ch’ a guardäva mé fjóla da putén’na e pò fat spiegär un po’ äd tàtica da Gigi o da un cuälch alenadór li csì, i van bén tutt, Morón Barone Pizzi, chì t’ n’é vója parchè dal potensjäl a gh’ n’é da véndor mo t’ si zgrùz da fär paura;

Longobärd déz

Masim di vót e as’ capìssa al parchè cuand al né gh’é mìga; l’é pù presjóz che l’òr in ch’ la scuädra chì, l’é pù facil zugär sénsa balón che sénsa Longobärd, sperèmma ch’ la sia ‘na còza da méza giornäda sionò l’é un bél cazén;

Muzètt sìncov

Dónca tato, con cóll fìzich lì at’ podrìss andär a fär al Corasér al “Quirinale”, a né t’ pól mìga zugär äd fiorètt, sarcär sémpor la zugäda rafinäda, al gol spetacolär, né ciapär né där via ‘na zbaräda che vùnna, tì at’ gh’é da fär a sportlädi, fär gnir su la scuädra ciapär dill punisjón, sfondär la porta con dill balonädi ch’ a vaga déntor anca al portér, am’ són spighè o no???;

Baraye sìncov

Pù concrét e meno narvóz l’ òmmo, sionò at’ pas la tò carjéra in sèrja D anca cuand al Pärma al salutrà e l’andrà indó l’é giùsst ch’ al vaga! Déz mèttor pù azvén ala porta e pù concrét, pù cativ pù concentrè, pù precìz in-t-al prìmm control, ch’ l’é còll ch’ a fa la difarénsa par cualùnncue zugadór, forsa e corag’ ch’ at’ si ancòrra giòvvon, sta tutt a ti e nisón ätor;

Guas cuàtor

A dir la vritè al gol al l’äva anca fat, mo l’é da cuand l’é rivè ch’ al pärla trop e al rénda poch in camp, e po’ arbitro o mìga arbitro chi lavór li j’én di lavór da pòch furob bombén, pròprja parchè al doväva savér che cóll pajas con la maja giälda al né spetäva ätor che casär fóra un cualchidón äd nojätor: dónca nanni, paroli ciäri e amicissia lónga, anca se in sèrja D chi sèmma a Pärma, e un cualchidón pù bón che ti a l’èmma vìsst zugär, dónca cambia regìsstor ala zvèlta o sionò a ch’ la scuädra chi a né t’ sarvìss a njént;

Apolón sìncov

Gigi, ti at’ j’ à vedrè tutt i dì, l’é anca véra, elóra cme mäj cuat’r atacant e li in méza i du picén lasè da lor a còrror adrè a tutt e ciapär un sach äd strénghi? L’é un perìod ch’ a pära che la scuädra la gh’ àbia il gambi pezànti (anca còssta chì l’é strana cme còza parchè l’é la scuädra con pù alenamént ädla categorìa), dónca mèj mèttor n’òmm (o anca du) in pù a metè camp e vón o du in meno davanti, tant par pistär’s i pè i bàston in dù;

Arbitro zéro

D’acòrdi che chi à vìsst con i sò òc Cassarà De Santis Boggi Ceccarini e compagnìa béla a ‘n s’ dovrìss pù scandalizär äd njént, mo anca färos tór p’r al *** da un mamlón ch’ al gh’à ancòrra al ciripàn in sèrja D, la m’ pär un po’ tròpa gròsa! Nevio, biològich o OGM, sérca d’andär’t a spiegär ala zvèlta che la mzùra l’é béle pasäda

CARICA CROCIATI

Correzione ortografica a cura di Enrico Maletti

Tutto il Parma minuto per minuto    

News, video, gallery, storia e curiosità gialloblù:

Ultimissime: leggi tutte le news

I video

Partita per partita

La classifica

I tifosi