Coric sénsa vót

E par fortón'na che davanti at' gh'é tri ch' i la san lónga, parchè l'ùnnica volta ch' a gh'é stè un méz perìccol at' m'é dè tanta sicurèssa cme restär a pè con la machina in-t-un camp äd zìnngor.

Garufo séz

Molt méj che a Mòdna (cme tùtta la scuädra dal rést) ghìggna da vón ch' al la sà lónga e la sensasjón ch' al sia ancòrra al sincuanta par sént; acuìsst imbrochè anca parchè al da l'idea d' ésor vón ch' al dróva la maruga in camp e bombén

Coly séz

'Na volta tant a podèmma ringrasjär l'arbitro parchè in-t-al prìmm témp al n' à mìga vìsst un placàg' da All Black al lìmmit äd l'area da cartlén pù colór 'd partugàl che giäld, p'r al rést a té m' si adrè pjazér, cuand un centräl al fa sintìr al fìzich l'é sémpor béle a metè äd l'òvra po' par la técnica e p'r i pè bón a gh'é al Capitàn, al gh' pénsa lù

Canén séz

Sät có gh'é? ch' at' gh' arè da ciamär un sartór parchè second mi il bräghi it' fan un po' difét dardè e a pär ch' at' gh' abi 'na panéra un po' da rezdóra da chi indrè, e cme difati specialmént al prìmm témp it' pasävon davanti cme in-t-la corsia dal telepass

Lucaréli sètt

Capitàn dìgghia 'na stupidäda ch' a té t' si adrè catär méj st' an', che al livél l'é carsù un po' pù che l‘an' pasè cuand al pù dil volti as' zugäva dabón un footbal da oratòri? Anca jerdlà partìda parféta, prìmm regìssta e anca bräv Gigi cuand al t'à risparmiè 'na vintén'na äd minud che tant la partìda la s' zugäva tùtta la davanti

Nunséla sètt

Cón il dovudi proporsjón, parchè sèmma adrè parlär äd du ch' à fat la storia dal Pärma, mo cóll ragas chi l'é un mìssto tra Benarrivo (al fizich) e Di Chiara (la manéra äd pontär l'avarsäri e sarcär al cross); in-t-al prìmm témp l'é stè impresjonant par cuant balón l'à miss in méza, a gh' srà da divartiros con chilù

Baraye séz

In fiducia, anca s'artór'n a dir ch' l'é cuaranta met'r indrè e cóll li l'é tutt fóra che la so pozisjón, anca parchè d'ogni tant al gh' à la tendénsa äd pèrdor la bala e sl' é trop dardè con la scuädra ch' l' é adrè gnìr su, l'é un cazén mìga da rìddor e prìmma o pò' la s' päga cära

Corapi òt

Al moto perpetuo, dardè, in méza e davanti, al “nostor” Ciccio l'é artornè al sént par sént, e second mi prìmma d' arnonsjär a un zugadór dal gènnor a gh' srà da pènsärog su domìlla vòlti, e po' mandär a sédros un cualchidón ätor l' istés

Scavón séz

Wè Batman, té t' si magnè un gol che sa t' fäv j'ezam dal sànngov at' gh' äv “trigliceridi e colesterolo” sént volti sóra al lìmmit, mo cme té fat, fam capir parchè l'éra béle déntor té gh' l'é caväda a ravojärot su cóll balón li cme un sachètt äd bruzèdi; a pärta cóll li, a tutt il manéri 'na béla partìda e pjàn pjanén a pär ch' a sia adrè rivär anca la gamba, parchè con cóll fìzich li a té gh' mètt pù témp che Ciccio sicur andär in forma

Nisolén séz

Par la prìmma vitòria a né s' da via gnanca un sìncov, però l' òmmo cme as' diz adésa al scóli superiori, at' gh'é un “débit”, parchè sl' é véra ch' a té gh' la mètt tùtta e anca äd pù, l'é anca véra che fin adésa a té fat 'na grand confuzjón e basta, ecco forsi con ti a gh'é da fär al discors invärs, còrra un po' meno e l'osìgeno ch'at' rispärmi cóll gambi màndol drìtt al sarvél, a tutt il manéri cuand vón al va fóra ch' a né gh' n'à pù l'é sémpor bräv

Calaiò déz

Chi a gh'é da rìddor, e da cridär par ch'j ätor! Gol da cineteca in-t-al momént pù important, mo pù ancòrra che cóll li la naturalèssa äd tutt i moviment ch' al s' cata a fär; ch' al fùss un zugadór äd n'ätra categoria al s' säva zamò, fa pjazér avérogh la conferma! Mesén'na/Evacuo/Guàs òt: tutt tri in camp vérs la fén con la concentrasjón e la rabia giùssta, e còssti chi j'én il còzi ch' a fa la difarénsa! BRAVISSIM tutt tri

Apolón ot

Bravo Gigi, cme j' ò pén'na scrìtt chi su, la concentrasjón di zugadór ch' a vén su dala panca l'é un termometro importànt bombén ädla salute ädla scuädra, a vól dir che fòrsi a s'é imbrochè la sträda giùssta; adésa a vrìss catè la manéra äd butär dént'r i cross dal prìmm témp cuand in camp a gh'é anca Evacuo e mìga a l'arvèrsa, e Baraye fam un pjazér, cuaranta mèttor pù su, però sé mìga l'avtosträda almeno la tangensjäla l'é städa imbrocäda e alora avanti acsì

CARICA CROCIATI

Correzione ortografica a cura di Enrico Maletti