Sei in Archivio

Sport

Pagelle in dialetto: Inter-Parma 1-0 - Mìsster, sentìdi condoljansi da pärta äd tutt i tifóz

23 aprile 2013, 19:42

Crociato 63

Mirànt cuàtor

Mo che gol ät ciapè ? A t’ paräv Tilio Basteri cuand al zugäva in porta, l’andäva zò un cuärt d’óra prìmma però al pu dil volti col pè al gh’ é riväva, tì invéci njénta, ‘na gàta e basta
 
Benalouane sètt
Codìggn e atént dardè, pu pericolóz che Belfodil e Biabiany miss insèmma davanti ! L’é tutt dir a tutt il manéri col ragas chi l’é vón ch’ a gh’ la mètta sémpor tùtta e con la scuädra ch’ l’à pär in vacansa da Nadäl l’é béle cuél

Còvva séz
Cme a s’ dìz, sénsa infamia e sénsa lode, però tra infortùnni, zbarädi e dormidi l’impresjón l’é che l’Udinéz la gh’ à vìsst bastànsa bén anca sta volta
 
Lucaréli séz
Sénsa colpi sul gol, e second mi a gh’éra anca un rigor in-t-al finäl ! 
 
Santacróza zéro
Mi a ’n capìss miga cuäl al sia al probléma, però a so che ogni volta ch’al zùga o ch’al vén su l’é un perìccol adrè  ch’ l’ätor, e insìmma al gol un movimént da film äd Stanlio e Ollio, roba ch’ a né s vèdda pù gnanca a Molèddol 3 al sàbot dopmezdì ! 
 
Gobbisìn cov
Jerdlà Massimo té gh’ si restè in méza cme un giovedì, i t’ n’ àn mìss du da la tò pärta e ancòrra ‘na volta a ’n gh’ é mìga stè la mòsa conträria e ti a t’ si andè in apnea subìt ! 
 
Valdes séz
Partìda parféta par figurär un pò méj dato ch’ l’é städa zugäda ai vint a l’ora, un gran tir e ‘na cuälca zugäda un pò pu incizìva ! Vót vèddor che Calimero con la primavéra al sälta fóra cme l’an’ pasè ! Sperèmma parchè sarìss anca ora
 
Marchionni sìncov
Marchino con la lénngua adrè téra e il gambi pézi un bél pò, second mi t’é mìss su anca un cuälca cavji bjanch ! Stà miga  preocupärot sucéda a tutt vè
 
Paról séz
Contra un centorcamp in coma cme còll äd l’Inter a gh’éra da schisär insìmma al gaz e zburlär, invéci val a capir al parchè a ’n gh’ i mäj provè fin in fónda a   fär mäl a l’Inter 
 
Belfodil zéro
N’ätor zugadór dal girón d’andäda ! Dopa il fésti é par cäz tornè indrè so fradél ? Lòmmo sérca äd därot da fär sionò al “top team” a t’ al väd s’ a t’ fè l’abonamént a Sky
 
Sansón cuàtor
Oh Tato, l’é séz méz ch’a t’ fagh di complimént, e tì l’é socuant fésti ch’ a t’ fè  a l’arvärsa äd prìmma ! L’é anca véra che pasär la bala a Biabiany davanti a la porta l’é cme butärla diretamént in curva, mo ch’ la bàla li la vräva pasäda e basta ! 
 
Amaur iséz
Al solit, do spani superior ala média, sia cme técnica che cme tésta ! certo che ogni domenica sintìros l’ùnnich ch’al spùda sànngov, ch’al lòta, ch’al ciapa dil gomdädi e dil zbarädi prìmma o pò vón al se fiàca anca 
 
Biabiany zéro
N’ocazjón clamoróza e cme al solit l’à fat tutt fóra che fär gol ! L’ùltma partìda decénta ch’ a m’arcòrd a memòrja l’é städa con l’Inter a l’andäda, fì vù ! Dill volti al pär un film äd Ridolini, al fa i dozént a l’ora dopa al sé scorda la bala indrè, al scapùssa, al casca, insòmma un lavór da zbudläros dal rìddor, ch’j ätor però.
 
Mìsster
So còza vól dir pèrdor un papà, un brasamént e sentìdi condoljansi da pärta mèjja cme da pärta äd tutt i tifóz, forsa e corag’ !
AVANTI CROCIATI
____________________
 
Correzione ortografica  
a cura di Enrico Maletti