Archivio

dialetto

Mendes, oh Mìsster Mondo e zveljäros prìmma no?

Il pagéli di Crozè in djalètt Pramzàn a cura di Crociato 63

di Crociato 63

18 febbraio 2015, 18:07

Mirànt déz
Parfét, padrón ädla diféza e l’area äd rigor e se dio vól anca un brizinén äd fortón’na con còll päl, mo l’éra ora !

Casàni déz
Partìda granda bombén, un gol salvè con n’intarvént strepitóz, gamba, maruga e luciditè; al Casàni äd l’an’ pasè, e s’ al gh’ fùss stè da l’inìssi dal campionät second mi un cuälch golètt in meno l’arìsson ciapè

 


Costa déz
Cuand at’ si in camp as’ sénta, a te m’ pjäz parchè a né t’ fè mäj un pas indrè con nisón e a né t’ gh’ é paura äd njént mo vèh at’ pòsja dir ‘na còza? at’ gh’é pròprja ‘na tozäda da arzàn vèh, Corallo o Marabu ziovàllser?

 

Lucaréli déz
Dur a morir, mäj molär ! có dir Capitàn, che jerdlà at’ m’é emosjonè pù äd ‘na volta, am’ paräva d’ésor mi in camp, con la vója äd fär vèddor a tutt che anca s’ i s’én adrè torturär in-t-na manéra mäj vìssta, la dignitè a né s’ la portarà mäj via nisón

 

Mendes déz 
Oh Mìsster Mondo, e zveljäros prìmma no? oltre che bél at’ si anca un zugadór da balón alóra! E dir che second mi at’ gh’é dìll cualitè mìga indifarénti, a vedrèmma st’ an’ ch’ vén, second mi con n’ätra maja adòs vè, a meno d’un miracol, in camp e fóra

 

Varela déz
At’ vè in-t-al caldarón di déz anca tì, anca sa t’ si stè al meno codìggn äd tutt; mo par ‘na volta ch’ as’ porta a ca’ un pónt (che tra du o tri dì a gh’ pénsa la disciplinära a tirärsol via) a ca’ äd ‘na scuädra sént volti pù forta, a né s’ fa mìga difarénsi con nisón

 

Nocerino déz
Centravanti äd manovra, l’é un po’ cme fär i nóz cój figh sèch, epur il scuädri avarsäri i gh’ mètton chi sìnch second in pù a portär su la bala par sarvìr al centorcàmp e ala diféza par mèttros un po’ méj e mìga fär dìll figuràsi cme tutt al girón d’andäda! po’ fär gol l’é sémpor pù difìccl che scalär l’Everst descälsa mo contintämmos che zà tant l’é acsì fin ala fén

 

Mauri déz
Second mi la Ròmma la gh’ farà pù d’un pensér par st’an’ ch’ vén dòpa la partìda strepitóza äd jerdlà; tant con ilj àrî ch’ a tira as’ gnirà a fär spéza a bón marchè un bél po’ da ch’il pärti chi

 

Mariga déz
Oh pilolón l’éra ora ch’ at’ zughìss ‘na partìda un po’ da razón e par novanta minud ; second mi l’éra da cuand andäva ancòrra a scóla ch’ a né t’ n’in fäv pù vùnna, e adésa m’arcmànd sérca äd färot mìga mäl sùbbit

 

Rodriguez déz
A m’ immàgin chilù in-t-la scuädra äd l’an’ pasè, second mi a sarìsson rivè atàca ala Champions, mo tant sarìss stè tutt inùttil, ätor che Licénsa Uefa, chi a minud i t’ stacävon anca l’acua al stadio ätor che...

 

Belfodil déz
E cuand at’ sucedrà pù äd ciapär un déz? märcol insìmma al lunäri che ogni an’ magàra a té gh’ fè l’anivarsäri, e sòra al cont a gh’é anca da dir ch’l ‘é stè un vót meritè, as’ vèdda che stär un po’ lontan da còll cazén chì a t’ à fat bén e a gh’ pòs anca crèddor

 

Donadón déz
Mìsster, dòpa socuànt crìttichi (giùssti second mi) un gran ciocamént äd man (applauso), anca p’r il paroli ala fén ädla partìda; fin in fonda e po’ la srà cme la srà, l’important a còll pont chi l’é mantgnìr fin in fonda la dignitè

AVANTI CROCIATI

Correzione ortografica a cura di Enrico Maletti