Archivio

pagelle in dialetto

Longobärd, lì davanti lù l'é al centratàch metodista

28 ottobre 2015, 10:52

Longobärd,  lì davanti lù l'é  al             centratàch metodista

Zommers déz
Äd sòlit il parädi decizìvi at’ j à fäv dòpa al novantézim, jerdlà invéci at’ j é fati a l’inìssi e che parädi, intarvént pròprja da campjón, a n’é mìga ch’ it’ vénon a sarcär béle a znär ah? parchè in A at’ gh’é da rivärogh con al Pärma sénsa ciapär di scurtón

Mesén’na òt
Tant par dir cme vojätor under a sì fat con al stampén, mi e un me amigh par tùtta la partìda a t’èmma ciamè Adorni e sa ‘n riguärd mìga la partìda cuand a son tornè a ca’, adésa a sariss adrè a fär la pagéla ad Adorni


Caciól déz
Un gol ch’ al väl òr, mo ancòrra äd pù ‘na partìda meraviljóza, parfét in marcadura, dur e tgnìss cme un vér stopper, si parchè ti a né t’ si mìga un “centräl difensìv” cme as’ diz adésa, at’ si un stopper cme da chi indrè, ch’ l’é un po’ la difarénsa ch’ a pasa da un “operatore ecologico” a ‘n “spasén”


Lucaréli òt
Adésa a t’ al digh, al tó prìmm gol a l’äva batzè jerdlà con al Lentzòn, am’ són zbaljè äd sìnch centimèttor, p’r al rést un po’ insognént al prìmm témp par po’ salir in càtedra al second!


Saporètt sètt
Al compitén e pòch ad pù, mo séns’ ätor a gh’éra l’ordin äd scuderia äd fär al tarsén (mìga “l’esterno basso”, as’ diz tarsén dailà) sénsa zburlär trop; al sät che vìsst da ‘zvén at’ pär còll ädla tèrsa C dai cavji ròss??


Miliètta nóv
Adésa ch’ l’é ‘drè mèttor la märcia giùssta as’ taca a vèddor la cualitè dal zugadór, decizamént äd n’ätra categorja; a pär ch’ al camén’na in méza al camp mo al gh’ à la calamìtta e tutt i balón i gh’ van adòs e po’ al gh’ à la capacitè äd där cualitè a tutt il zugäda!

Giorgén déz
Déz partìdi novsént minud, balón zbaljè in déz partìdi zéro! votasjón déz! a l’artór’n a dir, in sèrja B e anca in sèrja A as’ vèdda parècc’ medjàn meno fort che Giorgén


Ricci séz
Da äla sinìsstra (o da “esterno alto di sinistra” cme a va äd moda) at’ rendi un po’ meno, second mi at’ sarvìssa ‘na parténsa lanciäda par réndor al masim, tant at’ gh’é gamba, tésta e pè par fär la fàsa da ti sénsa fadiga


Lauria sètt
Parfét in méza al lìnei tra centorcàmp e atach, sinisstor delisjóz e un tir ch’ al pól fär mäl in cualùnncuemomént, tricuärtìssta, nùmmor déz, fantazìssta, a gh’ manca un pär äd gol in pù e po’ l’é asolutamént parfét


Baraye séz
Seconda partìda col freno a man tirè, e si che specialmént jerdlà l’éra la tò partìda; trop ält e bas p’r al momént, e l’é un pchè, parchè al potensjäl l’é da formula vón


Longobärd déz
Par còllragas chi a gh’é da inventär un ról nóv, cme a centorcàmp a gh’é al “centromediano metodista”, lì davanti lù l’é al centratàch metodista, al vér regìssta dal repärt, inteligént, generóz, concrét, carizmàtich, decizìv; la còza strana l’é cme mäj un zugadór acsì l’àbia pasè la so carjéra tra la D e la lega pro, còsste chi l’é un mistér dabón


Apolón déz
L’é véra che chì a gh’é ‘na róza da Lega Pro, l’é anca véra che po’ vénsor a n’é mäj facil e vénsor cme sèmma adrè fär nojätor ancòrra äd pù, parchè la scuädra la zuga sémp’r al balón, la gh’à sémpor la bala lè, la ‘n ciapa mìga gol su asjón, insomma Gigi p’r adésa a sèmma al lìmmit ädla perfesjón, a né t’ résta che tgnir älta la tensjón e andär avanti acsì
CARICA CROCIATI
Correzione ortografica
a cura di Enrico Maletti