Archivio

pagelle dialetto

Mesén'na déz, gol maraviljóz. Ägorfój séz: trop pòch tato

di Crociato 63

01 marzo 2016, 20:51

Mesén'na déz, gol maraviljóz. Ägorfój séz: trop pòch tato

Zommers òt

Tén tén l’é sémpor pù bräv; ciamè in cavsa 'na volta ogni morta äd Vèsscov, al s' fa sémpor catär pront, concentrè e, còza ancòrra pù importanta, trancuìll bombén; second mi cóll ragas chi, sòtta la màn äd Fulgón, al pól rivär in A con nojätor

Mesén'na déz

Gol maraviljóz e fòrsi al gol pù important dal campionät, in-t-al momént pù difìccil ! Hugh Grant l’é n’ätor ragas con di margin äd progrés altìssim !

Benas òt

Partìda parféta sia cme rendimént che cme mentalitè ! sarò anca pòch “politically correct”, mo a mi un stopper che i prìmm du o tri intarvént al fa sintìr i tachètt e al fjè in-t-la còppa al centratàch, al gòd bombén e lù con cla ghìggna lì da film western al fa capir a tutt che dal sò pärti a gh’é pòch da stär srén

Lucaréli òt

Al Capitàn l’é semp'r al Capitàn, al lìmmit ädla perfesjón anca jerdlà, con du o tri intarvént da lisäros i barbìz, dal rést l’é stè vón di difensór pù técnich in sèrja A, e cuand va su l’etè, la pól calär la gamba, mo la maruga e i pé bón i ’n dvénton mäj véc'

Ägorfój séz

Trop pòch tato, trop pòch, al gióron dal tò complean, vint’ an', am' sariss imaginè 'na partìda da ufo, invéci at' si stè mancè e botonè cme la vésta d’un prét, tant ch' a ’n m’arcòrd mìga gnanca 'na zugäda, a pärta cóll gol magnè

Miliètta sètt

Poca intensitè mo tri o cuator zugädi fondamentäli, a cuatär di bùz dardè, con l’inteligénsa äd vón ch’ al la sa lónga, in pratica t’é cantè e portè la cróza, “nomen omen” i dzävon i latén

Giorgén sètt

Zoratto col cucù, anca p'r al fat ch' a né t' fè mìga un gol gnan par zbalj, jerdlà t'é gh' si andè azvén un bél po’, mo gh’éra vón li pròprja par cäz ch' al t’ à deviè un gran tir, dai a vrà dir ch' at' farè cóll ädla promosjón

Simonètt séz

Anca ti un po’ trop timidén, va bén ch' at' gh’ äv Pippo davanti ch' l’é un zugadór äd n’ätor pianeta in sèrja D, mo 'pén’na un po’ pù äd cativérja sportiva la 'n ariss mìga dè fastìddi

Corapi séz

Ciccio, a zùgh al jolly par mìga därot un sìnch, però dai ch' l’é al momént äd därgh' adrè e stricär i dént, e ti at' si vón ch' a pól fär la difarénsa a tutt i minud, jerdlà t’é adritùra zbaljè 'na punisjón ch' at' l’äva batzäda cme gol oblighè invéci t’é tirè in curva

Baraye òt

A mi cóll ragas chi al mé pjäz sémp'r äd pù, par via ch' l’é rivè chi con la manéra äd zugär e äl caràtor d’un Balotéli picén e invéci adésa al me fa stravèddor parchè al zuga par la scuädra al sént par sént, sacrifìssi e assist a manètta, bravìssim Gigi e bravìssim lù a dimosträr tùtta la so inteligénsa in pù al talént

Muzètt séz

Un po’ meno brilant che ilj ùltmi fésti, però la gh' stà, anca ti prepärot bén par la voläda finäla ch' a gh' manca che nóv partìdi e dedchì inàns i pónt i välon al dòppi

Apolón séz

Gigi cme sèmma 'drè tribulär e stirasärla p'r il lónghi ah ? Jerdlà la s’é andäda bén un bél po’ parchè l’éra la clàsica partìda da zéro a zéro e la me idea l’é ch' a sèmma un po’ trop sul gambi p'r ésor 'na scuädra ch' la s' pól alenär cme 'na scuädra äd sèrja A, però a son convìnt che in dò o trèj fésti a darèmma la celeräda finäla al campionät , sarèmma su botéga e dèmma l’adio ala sèrja D 'na volta par tùtti

CARICA CROCIATI

Correzione ortografica a cura di Enrico Maletti