Archivio

pagelle in dialetto

Zommers déz: 'na paräda da ufo Giorgén al me pär Davids

08 marzo 2016, 22:01

Zommers déz: 'na paräda da ufo Giorgén al me pär Davids

Zommers déz
Al portér d’un livél suparjór, al s’ vèdda cuand al badàcia par tutt al témp po’ a gh’ riva un tir a partìda e al fa 'na paräda da ufo: jerdlà ancòrra sul vón a zéro un tir belìssim e ‘na paräda strepitóza

Mesén’na òt
Cuäzi cuäzi at’ fè n’ätor gol, béla corsa béla parsonalitè, crosadór äd prìmm livél, Hugh al vrìss confermè anca st’ an’ ch’ vèn sicur

Caciól òt
Partìda béla bombén p’r al frär ädla diféza, t’é catè un ragasén tgnìss e nojóz da marcär, as’ pól där ch’ al sia stè un tifóz äd l’arzàna un po’ vlinè, mo ti at’ gh’é fat capir che da ch’ il pärti li a fis’ciäva n’aria bàsa un bél po’

Lucaréli déz
Parfét, elegant, esensjäl, carizmàtich: se al Pärma l’é l’unnica scuädra imbatuda e
con la diféza pù forta dala sérja A ala sérja D, al prìmm da ringrasjär l’é col Sjòr con la S majùsscola chi, che sicur
l’ariss catè ancòrra da zugär in sèrja B cme mìnnim, invéci l’é gnù zò con nojätor par dimosträr a tùtta ch’ la manga äd pajàs äd federasjón e lega có vol dir dignitè: aplàvz, ciocamént äd man e aclamasjón!!!
Ägorfój séz
Un po’ pù fiach dìlj ùltmi fésti, gnan ‘na zugäda da ricordär, insòmma, da un ragàs äd gnan vint’an’ agh’ vrìss un po’ pù äd pévor sòtta la còvva ahn?

Giorgén òt
A fagh un paragón ch’ al me da fin fastìddi a nominärol, mo Giorgén al me pär Davids cuand l’éra al masim ädla forma e al paräva un can’ bulldog ataca ai garlètt äd j’avarsäri, con la difarénsa äd petnadùra però

Corapi sètt
Ciccio un pas avanti, cme condisjón e mentalitè, a né t’ si mìga ancòrra cóll spetacol ch’ at’ si stè fin a metè znär, mo t’é gh’ si ‘drè tornär ala zvèlta; n’ätor che in Lega Pro al gh’é sta trancuilamént

Ricci sètt
Di su, mo cme fät a färot cóll ciùff lì? Al pär stablì con dal bitùmn o incatramè, vèt dal barbér da còjj ch’ a fa i tècc’ dil ca’?? A pärta cóll li béla partìda concentrè atént e anca ti con la gamba ch’ l’é ‘drè migliorär bombén

Longobärdi òt
Al Longo se Dio vól dal prìmm minud, al né fa mìga gol elora có fal? Du assist (e con vón di du a momenti al tira via la tésta dal còl a Baraye ) e tanta äd ch’ la lèggna da fär andär un camén par vint an’; al gol dòpa al riva Longo, trancuìll ch’ al riva

Meländri òt
Montär su e sgnär un gran gol l’é sìggn äd profesionalitè e concentrasjón; a ‘n vój mìga fär un paragón scontè parchè a ‘n vój mìga ruvinär la fésta a nisón però as’ sèmma béle capì
Baraye déz
La märcia in pù äd ch’ la scuädra chi, e l’artór’n a dir, su cól ragas chi as’ védda la man äd Gigi lontan vìnt chilometri, da un solìssta sénsa disiplén’na e salvàtogh, al gh’à tirè fóra un zugadór strepitóz, ch’ al mètta sémpor davanti l’intarés ädla scuädra, ch’ al lota cme un león e ch’ al zuga prìmma äd tutt par ch’j ätor che tant po’ gol al la fa sémpor listés

Apolón déz
Séz pónt ‘na partìda in meno e ot ala fén: chi éra ch’ a criticäva Gigi par ‘na sostitusjón e ch’ al dzäva che con l’alenador dal Forlì in panchén’na arìsson véns al campionät béle a farvär? (No parchè a s’é sentì anca ch’ la coza chi dòpa al parègg’ äd Forlì); al sìv indó gh’ ì d’ andär vojätor? A vèddor la regia ai petali! Ah no pardón al Giglio! Ah no pardón al Mapei...

Correzione ortografica
a cura di Enrico Maletti